SC Internal reservation ದಲಿತರು ಮತ್ತು ಪರಿಶಿಷ್ಟ ಜಾತಿಯವರಲ್ಲಿಯೇ ಅತ್ಯಂತ ಹಿಂದುಳಿದ ಸಮುದಾಯಗಳಿಗೆ ಪ್ರತ್ಯೇಕ ಮೀಸಲಾತಿಯನ್ನು ಕಲ್ಪಿಸಬಹುದು ಎಂದು ಸುಪ್ರೀಂ ಕೋರ್ಟ್ ನೀಡಿದ ಐತಿಹಾಸಿಕ ತೀರ್ಪು, ಕರ್ನಾಟಕ ರಾಜ್ಯದಲ್ಲಿ ಆಂತರಿಕ ಮೀಸಲು ಪ್ರಕ್ರಿಯೆಗೆ ಚಾಲನೆ ನೀಡಿದೆ. ಅಂದಾಜು 4 ಲಕ್ಷ ಸರಕಾರಿ ಉದ್ಯೋಗಗಳು ಭರ್ತಿ ಆಗಲು ಬಾಕಿ ಇದೆ.
ಸರಕಾರ ಈಗ ಮತ್ತೊಂದು ಆಂತರಿಕ ಮೀಸಲು ಕೋಟವನ್ನು ಪ್ರಕಟಿಸಿದ್ದು, ಇದಕ್ಕು ವಿರೋಧ ವ್ಯಕ್ತವಾಗಿದೆ.
ಪರಿಶಿಷ್ಟ ಜಾತಿಯ ಎಡ ಸಮುದಾಯಕ್ಕೆ ಶೇ.5.25, ಬಲ ಸಮುದಾಯಕ್ಕೆ 5.25 ಮತ್ತು ಸ್ಪೃಶ್ಯ ಸಮುದಾಯಕ್ಕೆ ಶೇ.4.5 ಹಂಚಿಕೆ ಮಾಡಲಾಗಿದೆ. ಸ್ಪೃಶ್ಯ ಸಮುದಾಯದ ಮೀಸಲಾತಿಯಲ್ಲಿ ಶೇ.20 ಅನ್ನು ಅಲೆಮಾರಿ ಸಮುದಾಯಕ್ಕೆ ಮೀಸಲಿಡಲಾಗಿದೆ. 400 ರೋಸ್ಟರ್ ಪಾಯಿಂಟ್ ನಿಗದಿ ಮಾಡಲಾಗಿದೆ.
೨೦೨೪, ಆಗಸ್ಟ್ ೧ರಂದು ನ್ಯಾಯಮೂರ್ತಿ ಡಿ.ವೈ. ಚಂದ್ರಚೂಡ್ ನೇತೃತ್ವದ ಸರ್ವೋಚ್ಚ ನ್ಯಾಯಾಲಯದ ೭ ನ್ಯಾಯಾಧೀಶರ ಸಂವಿಧಾನ ಪೀಠವು ೬:೧ ಬಹುಮತದಲ್ಲಿ ಮಹತ್ವದ ತೀರ್ಪು ನೀಡಿತು. ೨೦೦೪ರ ಇ.ವಿ. ಚಿನ್ನಯ್ಯ vs ಆಂಧ್ರ ಪ್ರದೇಶ ಸರ್ಕಾರ ಪ್ರಕರಣದಲ್ಲಿನ ತನ್ನ ಹಿಂದಿನ ತೀರ್ಪನ್ನು ಅದು ತಳ್ಳಿಹಾಕಿತು. ಆಗಿನ ೫ ಸದಸ್ಯರ ಪೀಠವು, ‘ಅನುಸೂಚಿತ ಜಾತಿಗಳು ಒಂದೇ, ಸಮರೂಪದ ಗುಂಪಾಗಿದ್ದು, ಅವುಗಳನ್ನು ಮತ್ತಷ್ಟು ವಿಭಜಿಸಲು ಸಾಧ್ಯವಿಲ್ಲ’ ಎಂದು ಹೇಳಿತ್ತು. ಆದರೆ ೨೦೨೪ರ ಪೀಠವು, ‘ಎಲ್ಲಾ ಪರಿಶಿಷ್ಟ ಜಾತಿಗಳ ಸಮುದಾಯ ಒಂದೇ ಸಾಮಾಜಿಕ ಸ್ತರದಲ್ಲಿಲ್ಲ. ಕೆಲವು ಜಾತಿಗಳು ಅತ್ಯಂತ ಹಿಂದುಳಿದಿದ್ದರೆ, ಇನ್ನು ಕೆಲವು ತುಲನಾತ್ಮಕವಾಗಿ ಮುಂದುವರಿದಿವೆ. ಆದ್ದರಿಂದ ಅತ್ಯಂತ ಹಿಂದುಳಿದವರಿಗೆ ಆದ್ಯತೆ ನೀಡಲು ರಾಜ್ಯ ಸರ್ಕಾರಕ್ಕೆ ಅಧಿಕಾರವಿದೆ’ ಎಂದು ಸ್ಪಷ್ಟಪಡಿಸಿತು.
ಆದರೆ ನ್ಯಾಯಮೂರ್ತಿ ಬಿ.ಆರ್. ಗವಾಯಿ ಅವರು ಒಂದು ಪ್ರತ್ಯೇಕ ಅಭಿಪ್ರಾಯದಲ್ಲಿ, ‘ಕ್ರೀಮಿ ಲೇಯರ್’ ತತ್ವವನ್ನು ಪರಿಶಿಷ್ಟ ಜಾತಿಗಳಿಗೂ ವಿಸ್ತರಿಸಬೇಕು ಎಂದು ಅಭಿಪ್ರಾಯಪಟ್ಟರು. ಅಂದರೆ, ಐಎಎಸ್, ಐಪಿಎಸ್ ಆದವರ ಮಕ್ಕಳಿಗೆ ಎರಡನೇ ಅಥವಾ ಮೂರನೇ ತಲೆಮಾರಿನಲ್ಲೂ ಮೀಸಲಾತಿ ಸಿಗಬಾರದು. ಈ ಕ್ರೀಮಿ ಲೇಯರ್ ಹೊರತುಪಡಿಸುವ ನಿಯಮಗಳನ್ನು ರಾಜ್ಯಗಳು ರೂಪಿಸಬೇಕು ಎಂದೂ ಸುಪ್ರೀಂ ಕೋರ್ಟ್ ಹೇಳಿದೆ. ಇದು ಕರ್ನಾಟಕ ಸರ್ಕಾರದ ತಲೆನೋವನ್ನು ಹೆಚ್ಚಿಸಿದೆ.
ಸದಾಶಿವ ಆಯೋಗ ವರದಿ
ಕರ್ನಾಟಕದಲ್ಲಿ ಈ ಒಳ-ಮೀಸಲಾತಿ ಬಗ್ಗೆ ಚರ್ಚೆ ಹೊಸದೇನಲ್ಲ. ೨೦೧೨ರಲ್ಲೇ ನ್ಯಾಯಮೂರ್ತಿ ಎ.ಜೆ. ಸದಾಶಿವ ಅವರ ಆಯೋಗವು ೧೦೧ ಪರಿಶಿಷ್ಟ ಜಾತಿಗಳ ಜನಸಂಖ್ಯೆ ಮತ್ತು ಹಿಂದುಳಿಕೆಯನ್ನು ಅಧ್ಯಯನ ಮಾಡಿ ವರದಿ ಸಲ್ಲಿಸಿತ್ತು. ಪ್ರಯೋಜನಗಳು ಕೆಲವೇ ಸಮುದಾಯಗಳಿಗೆ ಸೀಮಿತವಾಗಿವೆ ಎಂದು ಆ ವರದಿ ತೋರಿಸಿಕೊಟ್ಟಿತು. ಸರ್ಕಾರ ಆ ವರದಿಯನ್ನು ಪುರಸ್ಕರಿಸಲೇ ಇಲ್ಲ.
೨೦೨೩ರಲ್ಲಿ ನಂತರ ಬಿಜೆಪಿ ಸರ್ಕಾರ ಪರಿಶಿಷ್ಟ ಜಾತಿಗಳ ಒಟ್ಟು ಮೀಸಲಾತಿಯನ್ನು ೧೫% ರಿಂದ ೧೭% ಕ್ಕೆ ಏರಿಸಿತು. ಆದರೆ ಚುನಾವಣಾ ನೀತಿ ಸಂಹಿತೆ ಕಾರಣಕ್ಕೆ ಆಂತರಿಕ ವಿಭಜನೆ ಸಾಧ್ಯವಾಗಲಿಲ್ಲ. ಇದೀಗ ಕಾಂಗ್ರೆಸ್ ಸರ್ಕಾರ ಅದನ್ನು ಜಾರಿಗೊಳಿಸುತ್ತಿದೆ.
ನಾಗಮೋಹನ್ ದಾಸ್ ಸೂತ್ರ
೨೦೨೪ರ ತೀರ್ಪಿನ ಬೆನ್ನಲ್ಲೇ ಸಿದ್ದರಾಮಯ್ಯ ಸರ್ಕಾರ ನಿವೃತ್ತ ನ್ಯಾಯಮೂರ್ತಿ ಎಚ್.ಎನ್. ನಾಗಮೋಹನ್ ದಾಸ್ ಅವರ ಅಧ್ಯಕ್ಷತೆಯಲ್ಲಿ ಒಂದು ಆಯೋಗ ರಚಿಸಿತು. ಸಮಾಜ ವೈಜ್ಞಾನಿಕ ಸಮೀಕ್ಷೆ ನಡೆಸಿದ ಈ ಆಯೋಗವು ೫ ಗುಂಪುಗಳಾಗಿ ವಿಭಜಿಸಲು ಸೂಚಿಸಿತ್ತು. ಆದರೆ ಸರ್ಕಾರ ಅದನ್ನು ಸರಳೀಕರಿಸಿ, ೩ ಗುಂಪುಗಳ ೬:೬:೫ ಸೂತ್ರವನ್ನು ಅನುಮೋದಿಸಿತು (ಒಟ್ಟು ೧೭%ರೊಳಗೆ):ಗುಂಪು ಎ (ಎಡ / SC Left) : ಮಾದಿಗ, ಆದಿದ್ರಾವಿಡಸೇರಿ ೧೬ ಜಾತಿಗಳಿಗೆ ೬%
ಗುಂಪು ಬಿ (ಬಲ / SC Right) : ಹೊಲೆಯ, ಛಲವಾಡದಿ, ಆದಿ ಕರ್ನಾಟಕ ಸೇರಿ ೧೯ ಜಾತಿಗಳಿಗೆ ೬%
ಗುಂಪು ಸಿ: ಲಂಬಾಣಿ, ಭೋವಿ, ಕೊರಚ, ಕೊರಮ, ಮತ್ತು ೫೯ ಅಲೆಮಾರಿ ಹಾಗೂ ಅರೆ-ಅಲೆಮಾರಿ ಪರಿಶಿಷ್ಟ ಜಾತಿಗಳಿಗೆ ೫%
ಈ ಸೂತ್ರವನ್ನು ಕೂಡಲೇ ಸರ್ಕಾರಿ ನೌಕರಿ ಮತ್ತು ಶಿಕ್ಷಣ ಪ್ರವೇಶಗಳಿಗೆ ಅನ್ವಯಿಸುವಂತೆ ಆದೇಶ ಹೊರಡಿಸಲಾಯಿತು. ಹಳೆಯ ರೋಸ್ಟರ್ ಪಾಯಿಂಟ್ ಪದ್ಧತಿಯನ್ನು ತಿದ್ದುಪಡಿ ಮಾಡಿ ಹೊಸ ರೋಸ್ಟರ್ ಅನ್ನು ಜಾರಿಗೆ ತರಲು ಮುಖ್ಯಕಾರ್ಯದರ್ಶಿ ಗೆ ಸೂಚಿಸಲಾಯಿತು.
ಹೈಕೋರ್ಟ್ನ ತಡೆ ಮತ್ತು ಹೋರಾಟ
ಹೊಸ ಸೂತ್ರ ಪ್ರಕಟವಾದ ತಕ್ಷಣ, ವಿಶೇಷವಾಗಿ SC Right ಗುಂಪಿನ ಮತ್ತು ‘ಗುಂಪು ಸಿ’ಯಲ್ಲಿನ ಕೆಲವು ಸಮುದಾಯಗಳು ಹೈಕೋರ್ಟ್ ಮೆಟ್ಟಿಲೇರಿದವು. ಮೂರು ಗುಂಪುಗಳಾಗಿ ವಿಂಗಡಿಸುವುದು ‘ವೈಜ್ಞಾನಿಕ ದತ್ತಾಂಶ’ದ ಆಧಾರದ ಮೇಲೆ ಇಲ್ಲ ಎಂಬುದು ಅವರ ಪ್ರಮುಖ ವಾದ. ನ್ಯಾಯಮೂರ್ತಿ ಸುರಜ್ ಗೋವಿಂದರಾಜ್ ಅವರ ಏಕಸದಸ್ಯ ಪೀಠವು ಅಕ್ಟೋಬರ್ ೨೦೨೫ರಲ್ಲಿ ಮಧ್ಯಂತರ ತಡೆಯಾಜ್ಞೆ ನೀಡಿತು. ‘ಸರ್ಕಾರವು ಆಗಸ್ಟ್ ೨೫, ೨೦೨೫ರ ಆದೇಶದ ಪ್ರಕಾರ ಯಾವುದೇ ನೇಮಕಾತಿ ಮಾಡಬಾರದು’ ಎಂದು ಆದೇಶಿಸಿತು. ಪರೀಕ್ಷೆ ನಡೆಸಬಹುದು, ಆದರೆ ಅಂತಿಮ ನೇಮಕಾತಿ ಇಲ್ಲ. ಪ್ರಕರಣ ಇನ್ನೂ ಪರಿಶೀಲನೆಯಲ್ಲಿದೆ.
ಏಪ್ರಿಲ್ ೨೦೨೬ರ ವೇಳೆಗೆ, ಈ ತಡೆಯಾಜ್ಞೆ ಮುಂದುವರೆದಿದೆ. ಪರಿಣಾಮವಾಗಿ ರಾಜ್ಯದಲ್ಲಿ ಸುಮಾರು ನಾಲ್ಕು ಲಕ್ಷ ಸರ್ಕಾರಿ ಹುದ್ದೆಗಳ ನೇಮಕಾತಿ ಪ್ರಕ್ರಿಯೆ ಸ್ಥಗಿತಗೊಂಡಿದೆ. ಅತ್ಯಂತ ಹಿಂದುಳಿದ ದಲಿತ ಯುವಕರು ಉದ್ಯೋಗಕ್ಕಾಗಿ ಕಾಯುತ್ತಿದ್ದಾರೆ.
ರಾಜಕೀಯ ಗುದ್ದಾಟ: ಕಾಂಗ್ರೆಸ್ vs ಬಿಜೆಪಿ
ಈ ವಿಷಯ ರಾಜಕೀಯ ಚರ್ಚೆಯ ಕೇಂದ್ರವಾಗಿದೆ. ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಅವರು, ‘ಸರ್ಕಾರವು ನಾಗಮೋಹನ್ ದಾಸ್ ವರದಿಯನ್ನು ವಿಕೃತಗೊಳಿಸಿದೆ. ವೈಜ್ಞಾನಿಕ ವಿಂಗಡನೆ ಮಾಡದೆ ರಾಜಕೀಯ ಲೆಕ್ಕಾಚಾರದಲ್ಲಿ ಮೂರು ಗುಂಪುಗಳನ್ನು ಮಾಡಲಾಗಿದೆ. ಇದರಿಂದ ಅಲೆಮಾರಿ ದಲಿತರಿಗೆ ಅನ್ಯಾಯವಾಗಿದೆ’ ಎಂದು ಆರೋಪಿಸಿದ್ದಾರೆ. ದಲಿತ ಮುಖಂಡ ಸಂಸದ ಗೋವಿಂದ ಕಾರಜೋಲ ಅವರು, ‘ಹಿಂದೆ ಬಿಜೆಪಿ ಸರ್ಕಾರ ಮೀಸಲಾತಿ ೧೭% ಮಾಡಿತ್ತು. ಕಾಂಗ್ರೆಸ್ ಅದನ್ನು ಜಾರಿಗೊಳಿಸುವಲ್ಲಿ ವಿಫಲವಾಗಿದೆ’ ಎಂದು ಟೀಕಿಸಿದರು.
ಮರು ಉತ್ತರವಾಗಿ ಕಾನೂನು ಸಚಿವ ಎಚ್.ಕೆ. ಪಾಟೀಲ್ ಅವರು, ‘ನ್ಯಾಯಾಲಯದ ತೀರ್ಪು ಬರಲಿ. ನಮ್ಮ ೬:೬:೫ ಸೂತ್ರವು ಸಂಪೂರ್ಣ ವೈಜ್ಞಾನಿಕವಾಗಿದ್ದು, ೫೯ ಅಲೆಮಾರಿ ಸಮುದಾಯಗಳನ್ನು ರಕ್ಷಿಸುತ್ತದೆ. ಇದನ್ನು ಸಮರ್ಥಿಸಿಕೊಳ್ಳಲು ಸರ್ಕಾರ ಸಿದ್ಧ’ ಎಂದು ಹೇಳಿದ್ದರು. ಅಂತರ್-ಜಾತಿ ಕಲಹ ಮತ್ತು ಕ್ರೀಮಿ ಲೇಯರ್ ಸಮಸ್ಯೆ ಇನ್ನೂ ಬಗೆಹರಿದಿಲ್ಲ.
ಲಭ್ಯವಿರುವ ಶೇ.15ರ ಮೀಸಲಾತಿಯಲ್ಲಿ ಪರಿಶಿಷ್ಟ ಜಾತಿ ‘ಎ’ (ಎಡಗೈ)ಗೆ ಶೇ.5.25, ಪರಿಶಿಷ್ಟ ಜಾತಿ ‘ಬಿ’ (ಬಲಗೈ)ಗೆ ಶೇ.5.25 ಹಾಗೂ ಪರಿಶಿಷ್ಟ ಜಾತಿ ‘ಸಿ’ (ಸ್ಪೃಶ್ಯ, ಅಲೆಮಾರಿ ಹಾಗೂ ಇತರರು)ಗೆ ಶೇ.4.5 ಮೀಸಲಾತಿ ನಿಗದಿ ಮಾಡಲು ಸಲಹೆ ನೀಡಲಾಗಿತ್ತು.
Category A (Dalit Left): 5.25% Category B (Dalit Right): 5.25% Category C (Other SC Communities): 4.5%
ಪರಿಶಿಷ್ಟ ಜಾತಿಯಲ್ಲಿ ಒಟ್ಟು 101 ಜಾತಿಗಳಿವೆ. ಈ ಪೈಕಿ ಬಲ ಸಮುದಾಯದಲ್ಲಿ 20, ಸ್ಪೃಶ್ಯ ಸಮುದಾಯದಲ್ಲಿ 63, ಎಡ ಸಮುದಾಯದಲ್ಲಿ 18 ಜಾತಿಗಳಿವೆ.
ಸುಪ್ರೀಂ ಕೋರ್ಟ್ ತೀರ್ಪು ದಲಿತರಲ್ಲಿಯೇ ಅತ್ಯಂತ ಹಿಂದುಳಿದವರಿಗೆ ನ್ಯಾಯ ದೊರಕಿಸುವ ಭರವಸೆ ಮೂಡಿಸಿತ್ತು. ಆದರೆ ಕರ್ನಾಟಕದಲ್ಲಿ ರೋಸ್ಟರ್ ಪಾಯಿಂಟ್ ಮತ್ತು ಒಳ-ಮೀಸಲಾತಿಯ 5.25-5.25-4.5ಸೂತ್ರ ಕೂಡ ಸರ್ವ ಸಮ್ಮತವಾಗಿಲ್ಲ. ಕಾನೂನಿನ ಕೊಂಡಿಗೆ ಸಿಲುಕಿಕೊಳ್ಳುವ ಸಾಧ್ಯತೆ ಇದೆ.. ನ್ಯಾಯಾಲಯಗಳ ತೀರ್ಪು, ರಾಜಕೀಯ ಇಚ್ಛಾಶಕ್ತಿ ಮತ್ತು ಸಮುದಾಯಗಳ ನಡುವಿನ ಸಹಮತ ಪ್ರಮುಖವಾಗಿದೆ. ಅಲ್ಲಿಯವರೆಗೆ, ‘ಯಾರ ಮೀಸಲಾತಿ, ಯಾರ ಪಾಲು?’ ಎಂಬ ಪ್ರಶ್ನೆ ಅನುತ್ತರವಾಗಿಯೇ ಉಳಿಯುತ್ತದೆ.
